mardi 29 novembre 2016

La BOnassa (per demorar cortesa!)

Alara, aquela empega !
Te la conti...
Arribi sul quai de la gara, que per un còp soi plan a l'ora (enfin aurèm polgut avèr lo tren de cinc oras vinte mas non, prenguèrem lo de cinc oras cinquanta), crompèri ma tilheta, corrèri pas brica, èri tota tranquileta. Amb las filhas esperàvem lo tren, qu'aviam plan reparat l'endrech ont s'arrestariá e ont la pòrta se devriá dobrir davant nos, per pas èsser quichadas per lo mond, e subretot, per aver de plaças assetadas per quatre, per poder mièlh trabalhar amb los ordenadors (pietat mon Dieu fasètz qu'aurèm de plaças per trabalhar!).
E vaquí que lo tren arriba, e que s'arresta QUASI davant nosautres, e que sèm QUASI las primièras per montar. Doncas esperàvem per montar, e aquí sonque davant ieu, pegada contra mon espatla, amb son poooolit parapuèja, son poooolit mantèl colorat, sos pooooolits pels blonds plan penchenats, plan regdes, i aviá la BOnassa (per demorar cortesa!).
Daissa passar un persona, doas personas, tres personas, quatre personas e encara e encara e aquó contunha encara e encara coma o diriá Francis...
«  Non mas va far passar tota la gara coma aquó ? » me poguèri pas empachar de dire...
«  Se calameeeejam, tot lo mond va montaaaaaar » me respond d'un ton coma se parlava a una debila, que mancavi de li metre un carpan !
« QUÉÉÉÉ ???? » racavèri.
Lo DRAC se desrevelha... Mas ma paure, vas comprene ta dolor...
« Non mas, se cal destendre èèè, es sièis oras èèè, es la fin de la jornada èèè, es acabada èèè » me respondiguèt encara mai amb un ton mai que mai debil.
« AAAAA NON, es pas acabada per ieu, se vei que coneisses pas la Maria-Joana, per ieu es sonque la debuta de la jornada, comença ara... Alara bolega ton bol, d'aquí sulpic abans que t'empegue lo carpan que t'espera dempuèi la primièra marcha del tren... Bona serada ».
BBBOnassa !

lundi 21 novembre 2016

La tanèca

Cada matin, que devriái dire puslèu ja cada ser, es aquí a m'esperar.
Espera que li balhèsse benlèu quicòm dins sa garganta, que l'emplenèsse de tot mon saber, o de çò que devriái saupre.
Li agrada que l'emplene. Mai l'empleni, mai li fa plaser.
Perqué ? Per me far cagar la jornada tota, tre l'alba.
Corredor, escalièrs, tren, tram, carrièra, fac, e quitament en classa alara que li demandi pas res solament: « mai cargada que sès, que te regala de me far cagar ».
Pensi qu'es nascuda per m'empachar de passar una vida vidanta tranquileta, coma los autres. Mas non ! Pas a ieu en tot cas.
Dins los escalièrs, me far tombar coma una tanèca, se met en travèrs de mon camin, me mescli los pès per m'anar empalar en bas de la pòrta. Commença plan la jornada !
Pel carrièra fa parièr, tròba de se metre dins de traucasses e BIM m'empali !
Dins lo tren, se petassa totjorn per èsser al mitan, quand de mond passan, e coma per azard, tomba a aquel moment, e s'escampa de tot son long dins lo passatge ^^ …
Per lo tram es quasi parièr, m'empacha de dintrar, perque a decidit qu'èra pas aquel tram que me caliá prene, se que non, buta lo mond, marcha sus lors pès e lor balha de còps dins los genolhs, e los meus tanben al passatge.
En classa, malurós ! Sabi pas perqué, al moment ont pas degun parla, ont es un silenci catedrala, »BRRLAAM » E vaquí que me fa encara remarcada, quina vergonha.
Se pòt pas empachar de me far cagar la jornada tota, fins al ser.
Emai, me pòdi pas brica me'n deseparar se que non seriái plan emmerdada sens ela. Fins finala es puslèu, una amiga, mas son coma aquò los amics, son los qu'as lo mai de besonh que te fan cagar !
« Mai cargada que sès, que te regala de me far cagar », e ieu me regali de l'emplenar, ma tanèca de polida valisa tant aimada !



mardi 8 novembre 2016

Las desvacanças

Vaquí, las vacanças son acabadas.
O puslèu las desvacanças se pòdi dire...
Foguèri conteeeeenta dimars a miègjorn e quinze minutas, quand "Mister" A. nos a dich "bonas vacaaaaanças". 
Mas durèt pas longtemps, perque, ja, primièra corsa tre qu' arribèri a la gara, qu'aviái pas la bilheta de tren, e que demorèt sièis minutas abans qu'arribèsse (çò qu'èra annonciat sul desplegant). 
Lèu cor! Per pas càmbiar. Urosament que las filhas m'avián pres la valisa.
Bilheta presa, arribi davant l' escalièr coma una caborda, dos tipes son aquí amb de casquetas, que me barran lo passatge per montar. Los agachi amb d'uèlhs ecarquilhats e un grand sorire (coma una piòta òc!), e lor disi :
« Òc, de que i a ? De que volètz ? ».

Los tipes rison coma se èri blonda, e me respondon a bèlas dents:

« E ben, vòstre títol de transpòrt ! ».

Quina vergonha ! Èran los contrarotlaires... ^_^'
Fin finala èri blonda.
Brèu ! Soi ieu.
Arribèri sul cai:
"Lo T.E.R en direccion de Narbona es annociat amb vintas minutas de retard!".
Genial, ai corregut per res.
Bon lo viatge passèt, amb tot çò que se pòt passar dins lo tren amb sos viatjaires tant estranhes los unes que los autres.
Arribi en cò mieu, m'espatarri sul sofà, amb mon plaid, e vòli PAS PUS REN AUSIR NI VEIRE DE L'OCCITAN, fins al mens aqueste ser!
Dormissi. dormissi. dormissi. dormissi. dormissi...
Parla! Vira que vira, que pòdi pas trapar lo sòm, ven pas. Pffff, i a pas pus qu'a trabalhar. Mas nooooon, qu'aviái doblidat que me caliá m'ocupar de la paperassa qu'aviái per la CAF, POPÒL, l'assistenta sociala, los rendetz-vos dels enfants en cò del metge, dels especialistes, de mandar de documents justificatius e de montar de dorsièrs, e ne passi.
Bon, s'i cal metre.
Sona totas las còlas que la magèr part son en vacanças VERTADIÈRAS ELES, perque respondon pas al telefonet.
Fa tot çò que cal far, a drecha a esquèra, dimècres, dijòus, divendrès...
Aqueste jorn, aviái un rendètz-vos en cò de l'assistenta sociala de la fac, e ben sabes pas qué? I posquèri pas anar perque la carta blava foguèt blocada perque pana sèca! Doncas pas de moneda pas de bilheta, e segur, pas de gasolina dins la veitura, e pas degun per m'i poder menar al darrièr moment.Òsca Sandra! L'emmascada, coma o ditz Melmel.
Disabte, dimenge, la familha de Tolosa que debarca, purèa, lo rambal.
Diluns, dimars, BLACK OUT! Soi cançada ne pòdi pas pus de ma vida de tracassat! 
DIMÈCRES, DINTRAAAADA! Sabi pas se me cal èsser degotada o contenta de tornar prene lors corses! Enfin, al mens ai pas temps de pensar a qué que siá! 
Mas es lo retorn del Jedai!




mardi 18 octobre 2016

La negada...

La sentisses la negada ?
Ieu òc ! Cresi que soi a negar dins l'aiga fangosa de las aigadas de la lenga!
Non ? LOL ! Ieu te disi de òc...
La negada de l'occitània. Qué disi ? De las estudís occitanas !
Vòls que te dise ? En fach soi sul « Titanic », o puslèu lo « Titanòc ».
Te vau dire, as volgut far la bèla de t'embarcar a la facultat de Montpelhièr, emai, a l'universitat Paul Valéry ! Ma cara ! Fas pas semblant !
Es pas tot d'anar a l'escòla, aprèp cal seguir.
Te fau la tièra :
  • un expausat per la Maria-Joana pel cors de metodologia. Que cal trapar de causas FÒÒÒRÇA originals per parlar del subjèct qu'ai causit : « Lo camèl de fuòòòc », qu'aquò' es pas pro original aparentament. Sabi pas çò qu'ausís per original ! Mas ai mon idèa, te la vau trapar ieu ta causa originala...
  • una ficha de lectura per la Maria-Joana ! Mas a quin moment vau poder legir aquel p*** de libre de Bodon ?
  • un expausat de mai per la Melania ! Subjèct : APRENE ! YOUHOU ! Aisit, òc solid, amb « Poder ponch» qu'i coneissi pas res ! Se que non farai coma los occitanistes, que lor agrada la recup', un « poder ponch » uman !
  • Un article de prèmsa per la Melania, un ! Subjèste libre, iha ! Ai lo subjèste, qu'es seriós, me cal sonque apondre qualquas oras a las jornadas de 24 oras !
  • resumitsssssssssss de conferénciassssssssssssss............. Aquò se passa de commentari...
  • traduccion de tèxtesssss de EN Alibeeert ! Nos va tuar lo tipe. Encara que, en fach te demanda talament de trabalh, que benlèu pensèt que l'anam pas far, o a mitan, e fins finala es el que se nega, nos demanda de li pas pus balhar de causas de corregir ! L'avèm atomizat lo tipe !

Aquò son just los gròsses trabalhs de far ! Perque aprèp i a tamben, Na Gretà (Gildas, mas que capiti pas de me remembrar son nom!), traduccion de medieval, conéisser lo cas subjècte que se met al plural al singular e al singular al plural mas al singular amb una S a la fin del non, e que se es cas regime es... Logic !
L'arbousset que me far pantaissar amb sas istòrias, me regali, mas fins finala nos balha pas mai de trabalh (pensi que va melhor).
Lieutard, disi pas res sus el que me vau far penjar per la Melania !!!
Lespoux, cossí dire... Es fòrça gentilhon, nos ditz de pas se'n far mas nos cal ja conéisser l'istòria tota dempuèi la creacion de l'umanitat ! 
Pèrdi pès, soi a me negar dins las estudis, ne vesi pas lo lum, pòdi pas pus bufar nimai alenar, ai l'impression que soi ennegada, e es pas res de lo dire... 

A! Ai doblidat LO BLÒG ! Lo me cal mandar sulpíc a la Melania !;-)

mardi 11 octobre 2016

La còla, las filhas...

Bon, vos meti de costat lo debanament de la jornada pel moment, que quitament ieu capiti pas res encara a l'emplec del temps, que son de "E11", "E 123", "E 5672" ! Vòl pas res dire aquò!
Non, uèi, vos vòli parlar de la còla. La còla de "L". Que sià L1, L2, L3 o SUFCO.
SUFCO??? De qu'es aquò? I a pas de "L" dedins ?
S, U, F, C, O, es lo S, U, F, C, ÒC (sus l'aire de Boney M!)  
Non es pas una cançon, ni mai una imne d'un equipa de rugbí, es plan la còla de las que se prenon per de jovas!
Remarca, nos anam apropriar lo nòstre imne, e ne far una cançon perqué pas !

Bon, la còla, qualas son? ...De FILHAS... ÒC, sonque de FILHAS...
SIÈIS FILHAS... Ò MALUR!

I a un provèrbi vièlh que ditz:
" Tres femnas dins un ostal: BATÈSTA!" 
Soi pas ieu o que disi mas Bodon dins lo castèl de raive.
Alara imaginatz vos SIÈIS...

Far petar la calamina!

Trombinoscòp:

  • "PrELOn Break" o "piu piu" 

Ela es la MAPA de la FAC! Es lo "Miquèl Scofield" de Pau Valèri, sap ont tot es, dins quin bastiment, corredor, camin... E nos balha totes los bons tudèls pels corses, pels professors, çò que lor agrada o pas, lor regime alimentari, lor gostes musicals, vestimentari... TOT!
Sa sola peca es que sap pas dire "piu piu" ! ;-)


  • "Flash MaPi" 

Campiona internacionala de decatlon, atletisme, cent metres, dos cent metres, l'entrainaïra de Usain Bolt. La cal pas perdre de vist e de ritme, se que non, desapareis...
"Digatz, Maria-Pèira? òc soi ieu, ont sès? Ai esternudat, e en cliquant d'uèlhs t'ai perdut de vist..."
Vesètz çò que vòli dire?...


  • "SambELI"

Es lo rai de solelh, la nòta exotica de la còla, la calor de Brasil, la dançaira de sambà!
La que nos fa de jòcs de mots que se 'n avisa pas, que mescla las lengas e que nos desvela los mots amagats brasilencs que vòlon dire de conariás en occitan!!! Es una regalada!
Sa doça votz cantanta vos ven potonejar las aurelhas...


  • "EscacalaTINE"

Es simple, s'escacalassa de tot temps! lo matin, "Adieuuuu", de qué fa? S'escacalassa! Le miejorn, "bon apetííííís", de qué fa? S'escacalassa! En cors, "Pfooooo i compreni pas reeeees", de qué fa? S'escacalassa! "Ooooo ai mal de cap", de qué fa? s'ecacalassa! Es un plaser de veire que, qué que se passa, es a s'escacalassar, es una potinga a la morositat!

E la que se ganha la palma d'aur es... (tamborrejada!)

  • "LA VAL QUE RITZ"; 

Alara ela, i a quicòm... Un bocinàs, un tròçàs, un talhassàs, enfin, un cas d'estudis pels scientifics, de psicològs, per la NASA, perqué es pas possible, es pas un èsser uman.
Non mas espèra, la filha, ja:
- a cinc enfants que van de la mairala a l'universitat (Que despassan la maire ja),
- 18 cavals que manjan coma de dracs
- los òmes? Los compti pas!!!

Demòra a PÒRT LA NOVÈLA, se leva a 4 oras del matin, s'ocupa dels cavals e que textòta en meteis temps a cinc personas diferentas, levat que s'engana de destinatari, s'ocupa dels enfants, dels tipes que son per carrièra, pren son trin, cap a Montpelhièr, fa sa jornada, tòrna lo ser a l'ostal a ONZE ORAS del ser (aquò es quand i pas de tardança), que fa lo recapte, le repais e tot aquò, son trabalh en òc...
Mas, QUAND DORMIS???
E qué que se passa, es tojorn a rire (quitament en plen mitan del cors perque sosca a quicòm de risolièr!) e de córrer dins un sens e de l'autra la jornada tota.
I tiri mon capèl !

Fa un mes passat que sèm a quasi viure amassas, e quitament se a la debuta èrem encara a se cercar, ara pensi que sèm partidas sus una bona dinamica de conariás!

mardi 4 octobre 2016

Lo viatge...

Aquí i sèm !
Ara me cal trapar la Valèria. De qué m'a dich ja ? Primièra o segonda veitura ? A man drecha o man esquèra ? Me rapeli pas mai... Soi piòta...
Ane, sortís ton telefonet per verificar ont t'a dich.
Va plan es la primièra a man esquera !
Vai-i que vau e veni, e pas de Valèria...
Tòrni prene lo telefonet per la sonar:
- "Òc soi ieu, disi en parlufejant "discretament".
Ont sès ? Me ditz la Valèria encara mai discretament que ieu, que l'ausissi dempuèi l'autre bout del vagon, quitament sens telefonet.
E ben soi ont m'as dich, a man esquera dins la primièra veitura !
- Mas non ! Soi dins la segonda a man drecha !
- Òc, bon...,(calrà s'assegurar de sa dislexi degenerescenta neuronala a la filha).
- Bon arribi !
- Ohoooo soi aquííí !" 
E vaquí que sèm amassas per lo viatge.

Espèra,mas es pas acabat! Me cal tot sortir amb ma valisa, al mitan del corredor, que las gents son pas totas encara assetadas, e que fan que passar, d'anar, tornar.
Sortís tot ton rambal, sus la graaanda taula, espandís-te, bolèga tot, balha de còp de pès al veisin, (ops perdon!), e va plan sèm lèstas ! 
"- Bon, per qué commençam ? 
 - Pffff sabi pas, avèm lo Alibert, la Melania, la MJV...e tant d'autres.............
 - BON, anam per lo Alibert puèi que se pòt pas jamai arestar de nos balhar de reviradas e gramatica e reviradas e gramatica.....pfioooof! Dormissèm amb Alibert!!! 
E vaquí que partissèm per la lenga.
Ooo lèu arribam a Montpelhièr! Mas es pas possible avèm pas polgut gaire fach de linhas?? 
Ane, lèu dintra tot dins la valisa, buta lo mond, tomba los libres sul cap del tipe que fa lo morre dempuèi Agde. Tant pis per el , a pas de far la tronha!
Bon lèu cal davalar, espèra lo mond que davalan, de se far un camin per sortir d'aquela p*** de gara... AQUI ! avèm trapar quicòm de rare...L'OXIGÈN !
Mas es pas acabat! 
Nos cal agantar un tram ont i una plaça plan granda per nòstre cul!
Pudís dins aquel canilha... de bon matin i a de que se pausar de questions...
Enfin sèm arribadas. 
Mas es pas accabat!
Ara, corrissèm encara fins en cò de Paul (qu'es pas lo meteis que Pòle... emplec).
Fa rotlar la valisa, que tot lo mond se tòrnan talament que fa de bruch!
Monta los escalièrs, e ENFIN , sèm arribadas !
Mas es pas acabat! Ara, nos cal afrontar la jornadassa que nos espèra.....

mardi 27 septembre 2016

Es pas una prangièra!

Pfffioooof !
E vaquí que soi encara aquí per contunhar de far l'estudianta.
Ai l'impression de pas tocar tèrra. Es un d'aquòs de baug, lo ritme. 
Me demandi cossí fan los professors? An pas de vida es pas possible ! Quand vesi que reçaupi de corrièls a vint e dos, vint e tres, o quitament doas oras quaranta sèt del matin????? Son fòls aqueles tipes de se balhar còrs e arma a aquela P... de lenga !!! Dormisson pas jamai ?? Me demandi tanben se dormisson pas a la fac fin finala. Son totjorn aquí quand arribam e quand partissèm.
Pr'aquò, nosautras avèm ja de jornadas plan clafidas:
Primièra setmana:
Lo matin,
-5 oras 58: (òc perqué es pas luènh de 6 oras e psicologicament es pas possible de me levar mai d'ora), lèva-te Sandra (es lo títol de mon revelh), aquò foncciona!

6 oras: lèva los pèques lèu...

6 oras 01: docha, lèu

6 oras 11: A! lo telefonet tinda, es la Valèria que me manda un messatge per me dire dins quina veitura e a quina plaça es dins lo trin, per que la tròbe lèu fach en arribant al trin. Aquò vòl dire que, se soi encara a la docha, es que soi a la borra !(e soi a la borra...)

6 oras 13: lèu lèu farga-te, a l'arraca...

6 oras 16: càmbii de vestits (perque lo regime concombre, lemon, gengibre foncciona pas)

6 oras 18: Soi presta, non, quasi en fach...Ai pas encara rafalada la faciada.Nifla!

6 oras 19: lèèèu, un trach negre per aquí un trach negre per ailà, un còp de mascarà als uèlhs, un gisclet de perfum e basta ! 

6 oras 25: i anam !...Non, AI PAS PRES MON DEJUNAR, LÈU LÈU LÈU !!!!
"Angiiiie Lòliiiiiie (son mos enfants) Lèu me venètz dobrir lo portal soi a la borra!" 

6 oras 35: (lo temps de davalar l'escalièr e de traversar la cort)
Ane! Vai-i corrís, pren la veitura, va lèu, (manqui de me manjar lo trepador!), cèrca de plaça per te parquejar tòrna, tòrna...

6 oras 41: capiti de trapar una plaça, OF! Lo trin es a 6 oras 46, soi larga... pensa!
Corrís Corrís Corrís... Arribi...

6 oras 46: sauti dins lo trin quasi en marcha... 

E vos conti pas per uèi lo demai de la jornada, se que non me calriá sonar un ostal d'edicion per mon libre!

Enfin, SOI VIVANTA !

Mas per quant de temps? ......






vendredi 23 septembre 2016

Me presenti !
Qual soi?!? Vos demandatz benlèu perqué aver causit lo pseudo "Tatà Calam'mina ? Ben, ai enveja de dire que, es a l'imaginacion de cadun ! Se coneissètz plan la lenga nòstra , la lenga d'aquí, la lenga del còr, i poirètz veire un fum d'interpretacions possibles ! Calam , mina ...A, Aaaa?!?! Anatz-i Soscatz ! Tatà Calam'mina qual es? Es una jova maire de 36 ans, qu'a dos enfants de tretze e setze ans(una filha e un garçon)que torna a l'escòla. Existís de maires exemplàrias, totjorn picantas, pimpantas, risentas, aquelas que preparan de pastissons per la fèsta de l'escòla, legisson d'istòrias als enfants, que fan lo recapte de l'ostal totjorn lusent, e qu' arriban tanben de far d'espòrt sens susar...
E puèi i a las autras, aquelas qu'arriban cada còp a la borra, que corisson de tot temps, que tampan la pòrta en daissant la clau dessús, que fan cremar la còca, que doblidan totjorn quicòm, qu'an totjorn lo rambalh a l'ostal, que lor arriba de longa de bricòlas de malastres, que fa de cofas e que bevon un còp, fan la fèsta amb los amics de temps en quora sens aver d'escrupuls! Mas que se sortisson amb la riseta! Tatà es ela, Tatà soi ieu!